Vincent

Vincent Eyjólfsson er nefndur í Sturlungu. Vincentius kemur fyrir í dönskum heimildum frá 12. öld og þekkist einnig í fornsænsku ásamt styttri myndinni Vinze. Yngri er myndin Vincentz en frá 15. öld hefur Vincent verið notað bæði í Danmörku og Svíþjóð. Vincent er einnig gamalt á Englandi og talið fornfrönsk mynd af latneska nafninu Vincēns, í eignarfalli Vincēntis, skylt sögninni „vincēre“ sem merkir „sigra“. Vinsældir sínar sótti nafnið snemma á miðöldum til dýrlingsins Vincens frá Saragossa sem dó píslarvættisdauða, en síðar höfðu átrúnaður á franska dýrlinginn Vincens frá Lérin og heilagan Vincent frá Paul talsverð áhrif á útbreiðslu nafnsins.