Thomas

Nafnið er upphaflega hebreskt, „thomas“, leitt af arameísku viðurnefni „te'omā“ sem merkir „tvíburi“. Það sótti vinsældir sínar til Biblíunnar en Tómas var einn af lærisveinum Jesú og er þar nefndur „tvíburi“ í Jóhannesarguðspjalli. Kirkjufaðirinn Tómas af Aquino átti þátt í vinsældum nafnsins á 13. öld en enn meiri áhrif hafði Tómas frá Becket, erkibiskup sem tekinn var af lífi í dómkirkjunni í Kantaraborg á 12. öld og um hann var ort Tómas diktur erkibiskups og rituð Tómas saga erkibiskups. Nafnið hefur verið algengt á Norðurlöndum frá 12. öld og er einnig gamalt í ensku- og þýskumælandi löndum.